Proprio śa 70 ane, ai 14 de luio del 1946, s’à ciatà sul Passo Sella 3.000 Ladis par domandà che dute i paesc ladis vegnise betude aduna inze ra Provinzia de Bolzan. Dapò de 70 ane i Ladis i é ancora spartide fora, intrà tre Provinzies. El augurio de una Ladinia danoo aduna l é restà fin ancuoi par deban. Ra Süd-Tiroler Freiheit con el consilier de ra provinzia Bernhard Zimmerhofer e outre funzionare vegnarà ai 16 de luio sul Sella par recordà chesto aniversario storico par i Ladis e par tegnì outa ra domanda de una Ladinia aduna.

Par secole ra vales ladines res é stades aduna inze el Tirol. Dapò ra Prin Guera, con ra ocupazion taliana, l é canbià duto de colpo. Par una talianiśazion pì forte e pì fonda, ra vales ladines res é stades spartides fora inze tre provinzies de ancuoi: Bolzan, Trento e Belun.

Canche, dapò ra Seconda Guera Mondiale, se vorea tornà a bete aduna el Südtirol a ra Austria, anche i Ladis à domandà de bete aduna i Ladis spartide fora con chi inze el Südtirol. Ma nuia da fei, duto par deban.

Ai 28 e 29 de otobre 2007 el 79,87 % de ci che stajea inze i Comus de Anpezo, Col e Fodom, i é stade dacordo de tornà a èse inze el Südtirol con un referendum.

Nuia da fei gnanche con chel, no n é canbià nuia. Ancora ancuoi no n é neguna protezion par i Ladis de ra Provinzia de Belun, e chesto l é tanto gréo: inze ra scora e ra cultura (toponomastica), l é biśoin de fei un gran laoro.

Ra manifestazion sul Sella de domegna che vien, agnó che vien recorda chera de śa 70 ane, l é anche un invito a ra politica de ra Provinzia de Bolzan. Che ra se tole a cuor el so impegno de precurà i interese de i Ladis – che l é el popolo pì vecio de el Tirol – e anche de chi inze ra Provinzies śò par pede.

Ra Süd-Tiroler Freiheit se ciatarà inze ra setemanes che vien con i raprejentantes dei comus par parlà de iniziatives par sostegnì i Ladis.

L é inportante se rende conto che ra unità del Tirol r’é leada a ra unità de ra Ladinia!

Ra Süd-Tiroler Freiheit
Freies Bündnis für Tirol.

Hinweis: Herzlicher Dank ergeht an das Ladinische Kulturinstitut „Cesa de Jan“ in Col (Verseil), das den Text ins Ampezzaner (Haydener) Ladinische übersetzte.